Yadda Jagora (H) ya halarci Jana’izar Sayyid Nasarallah

Jagoran Juyin Juya Halin Musulunci, Ayatollah Seyyed Ali Khamenei, ya kai ziyara kabarin marigayi wanda ya assasa Jamhuriyar Musulunci ta Iran, Imam Khomeini, a jajibirin cika shekaru 47 na Juyin Juya Halin Musulunci.

A yayin ziyarar da ya kai a ranar Asabar, Ayatollah Khamenei ya gabatar da addu’o’i a wajen tare da sabunta mubaya’arsa ga manufofi da akidun Imam Khomeini. Har ila yau, Jagoran ya girmama shahidan Juyin Juya Halin Musulunci.

Ranar Lahadi ta yi daidai da ranar dawowar Imam Khomeini daga gudun hijira a birnin Paris na Faransa a shekarar 1979, lamarin da ya tayar da zanga-zangar kasa baki ɗaya kan mulkin Pahlavi da Amurka ke mara wa baya a Iran, wanda daga bisani ya kai ga kifar da mulkin.

A duk shekara, ana tunawa da wannan rana ta hanyar bukukuwan kwanaki 10 na Alfijir a Iran da kuma wasu ƙasashe, ta hannun masu goyon bayan Jamhuriyar Musulunci.

Ziyarar Jagoran ta zo ne duk da wasu rahotanni, ciki har da na tashar talabijin ta ‘Iran International’, da suka yada karyar cewa Ayatollah Khamenei na “boye a wani rumbun karkashin kasa” a Tehran sakamakon ƙarin tsamin dangantaka da Amurka.

Shugaban Amurka, Donald Trump, ya sha yin barazanar kai wa Iran hari bayan ya tunzura tashin hankali a farkon wannan wata, inda ya yi kira ga masu tayar da tarzoma dauke da makamai da su kwace cibiyoyin gwamnati, tare da alkawarin cewa “taimako na kan hanya.”

Masu tayar da tarzomar dauke da makamai da ‘yan ta’adda da kasashen waje ke marawa baya sun karkatar da zanga-zangar lumana da aka yi bisa korafin matsalolin tattalin arziki a ranakun 8 da 9 ga watan Janairu. Rikicin ya haifar da mummunar barna ga dukiyoyin gwamnati da masu zaman kansu, ciki har da lalata shaguna, cibiyoyin gwamnati, wuraren hidimar jama’a, da kuma kashe dubban fararen hula da jami’an tsaro.

A daidai lokacin da ake ganin gagarumin tarin sojoji a kusa da gabar tekun Iran da ma a cikin tekun, Trump daga bisani ya sauya salon maganarsa daga yiwuwar kai hari ta soja domin taimaka wa ‘yan ta’adda masu tarzoma, zuwa matsa wa Iran lamba ta yi watsi da shirinta na nukiliya.

A wasu kalamai da rubuce-rubuce da ya wallafa a intanet, Trump ya yi kira ga Iran da ta kulla yarjejeniya, yana mai gargadin cewa kin yin hakan zai janyo hari ta soji “mafi muni” fiye da harin da Amurka ta kai kan cibiyoyin nukiliyar Iran a watan Yunin 2025.

Iran ta sha yin watsi da barazana da tilastawa, tana jaddada cewa diflomasiyya ba za ta yi nasara a karkashin matsin lamba ko tsoratarwa ba. Ta ce a shirye take ta shiga tattaunawa idan za ta kasance bisa adalci da girmamawa ta juna, tare da gargadin cewa duk wani hari na soja da Amurka ko kawayenta za su kai kan muradun Iran, za a mayar da martani cikin gaggawa da karfi.