Babban kwamandan rundunar sojin Iran ya bayyana cewa dakarun ƙasar suna cikin cikakken shiri don fuskantar duk wani artabu na soja, yana mai gargadin cewa duk wani kuskure ko ta’adi daga Isra’ila ko Amurka zai jefa tsaronsu cikin hatsari tare da dagula zaman lafiya a yankin.
Da yake jawabi a ranar Asabar a wajen bikin “Matashin Soja na Rundunar Soji”, Manjo
Janar Amir Hatami ya jaddada cewa
Iran tana aiki ne a matakin tsaro mafi kololuwa, tare da cikakken haɗin kai
tsakanin dukkan sassan rundunar sojin ƙasar.
“Abokan gaba suna ƙarƙashin cikakken sa ido a
gare mu, kuma tunda mun san mugayen manufofinsu, yatsanmu yana kan maɓallin
harbi,” in ji Janar Hatami.
Ya kuma gargadi cewa, “Idan suka yi kuskure ko
ƙididdigar da ba daidai ba, ba tare da wata jinkiri ba, za su jefa tsaronsu,
sojojinsu, yankin baki ɗaya, da gwamnatin sahyoniyawan Isra’ila cikin mummunan
haɗari.”
Hatami ya ce ƙarfin sojin Iran ya ƙaru matuƙa
tun bayan yaƙin kwanaki 12 da Isra’ila da Amurka suka tilasta wa ƙasar,
musamman a bangaren makamai masu linzami, kariyar sararin samaniya, da ƙarfin
tsoratarwa.
Ya jaddada cewa wannan kwarewa ta sauya
fahimtar Iran game da yaƙin zamani, tare da fallasa raunin abokan gaba da kuma
ƙarfin Iran kanta.
“Ko Rasha, wadda ta shafe fiye da shekaru uku
tana fafatawa da ƙasashen NATO, ba ta da irin wannan kwarewar kwanaki 12 da
muka samu. Mun fuskanci dukkan ilimi da fasahar abokan gaba da yaƙin gauraye;
mun gano rauninsu da ƙarfinsu, haka nan mun fahimci namu. A yau mun shirya ta
wata hanya dabam; ƙarfin tsaronmu ba abu ba ne da za a iya rusa shi,” in ji
shi.
A ranar 13
ga Yuni, Isra’ila ta kai hari kan Iran ba tare da wani dalili ba, inda
ta kai farmaki kan fararen hula, wuraren soja, da cibiyoyin nukiliya, lamarin
da ya yi sanadin mutuwar manyan kwamandoji, masana nukiliya, da fararen hula da
dama.
Iran ta mayar da martani da hare-haren jiragen
sama marasa matuƙa da makamai masu linzami kan yankunan da aka mamaye, inda ta
kai hari kan matsugunnan Isra’ila da wuraren soja.
A ranar 22
ga Yuni, sojojin sama da na ruwa na Amurka suka ƙara tsananta rikicin
ta hanyar kai hari kan cibiyoyin nukiliya uku na Iran, abin da ya saba wa
dokokin kasa da kasa. Iran ta mayar da martani washegari ta hanyar kai hari kan
sansanin sojin Amurka a Qatar, inda aka lalata wasu sassa na sansanin.
A ranar 24
ga Yuni, bayan sun sha asara mai yawa, Isra’ila da Amurka suka amince
da dakatar da faɗa.
Hatami ya kuma bayyana cewa ƙasashen makwabta
sun hana amfani da ƙasarsu da sararin samaniyarsu wajen kai hari kan Iran, yana
mai gargadin cewa duk wani hari kan Iran zai yaɗa rashin tsaro a duk yankin
Yammacin Asiya.
Ya ƙara da cewa takunkumi da matsin tattalin
arziki ba za su raunana ƙuduriyar Iran ba.
Har yanzu dai fargaba na ci gaba da ƙaruwa
yayin da Rundunar Tsakiyar Amurka (US Central Command) ke faɗaɗa kasancewarta a
yankin, ta hanyar tura jiragen ruwa na yaƙi, jiragen sama, da sojoji bisa
hujjar “kare tsaron yankin.”
Iran ta yi gargadin cewa duk wani hari zai
fuskanci martani cikin gaggawa da ƙarfi.
Jami’an
Iran sun jaddada cewa kasancewar Amurka a yankin na ƙara tayar da rikici tare
da raunana haɗin kan yankin, yayin da Iran ke ci gaba da zama sahihiyar gwarzon
tabbatar da tsaro a Yammacin Asiya.
Post a Comment