Yadda Jagora (H) ya halarci Jana’izar Sayyid Nasarallah

Gwamnan Jihar Zamfara, Dauda Lawal, ya sake jaddada matsayar gwamnatin sa na ƙin shiga tattaunawa ko ƙulla yarjejeniyar sulhu da ’yan bindiga, yana mai cewa gwamnatin jihar ba za ta amince da zaman sulhu da ƙungiyoyin masu aikata laifuka ba.

Gwamnan ya bayyana hakan ne a wata hira da ya yi da Sashen Hausa na BBC, wadda aka saurara a Kaduna, inda ya ce gwamnatinsa na ci gaba da goyon bayan dabarar yaƙi da rashin tsaro ta hanyar amfani da jami’an tsaro maimakon tattaunawa da masu aikata laifuka.

Dauda Lawal ya ce ba abin yarda ba ne ga kowane mutum ko ƙungiya ta shiga tsakani wajen ƙulla yarjejeniyar zaman lafiya da ’yan bindiga, yana mai jaddada cewa duk wanda ke yin hakan yana yi ne a madadinsa ba tare da wakiltar gwamnatin jihar ba.

A cewarsa, tun daga farkon mulkinsa gwamnati ta tsaya tsayin daka kan cewa ba za ta yi sulhu da ƙungiyoyin da ke da alhakin kashe-kashe, garkuwa da mutane da kai hare-hare kan al’ummomi a faɗin jihar ba.

“Ra’ayin neman sulhu da ’yan bindiga ba ra’ayina ba ne, kuma ba zai taɓa zama haka ba,” in ji gwamnan, yana mai jaddada cewa gwamnatin jihar ba za ta yi sassauci da masu aikata laifuka ba.

Gwamnan ya bayyana cewa wasu rahotannin da ke yawo kan cewa an samu yarjejeniyar sulhu a wasu sassan jihar ba su samu amincewar gwamnatin Zamfara ba.

Ya ce gwamnatin jihar ba ta da hannu a irin waɗannan shirye-shirye, kuma ba ta sauya matsayarta kan yadda za a magance matsalar tsaro ba.

Lawal ya nuna cikakken kwarin gwiwa kan cewa jami’an tsaro za su iya kawo ƙarshen ayyukan ’yan bindiga, yana mai cewa babu wata ƙungiyar masu laifi da ta fi ƙarfin gwamnatin Najeriya.

“Gwamnati ta fi ƙarfin kowace ƙungiyar ’yan bindiga,” in ji shi.

Ya ƙara da cewa ci gaba da gudanar da hare-haren tsaro tare da haɗin kai tsakanin hukumomin tsaro zai taimaka wajen dawo da zaman lafiya mai ɗorewa a jihar.

Gwamnan ya tunatar da cewa an yi ƙoƙarin yin sulhu da ’yan bindiga a baya, amma hakan bai samar da mafita ba.

A maimakon haka, ya ce irin waɗannan yarjejeniyoyi sun ƙara wa masu aikata laifukan ƙarfin guiwa tare da ba su damar ci gaba da ayyukansu.

A cewarsa, dabarar tsaron da ake aiwatarwa yanzu a Zamfara ta fara nuna sakamako mai kyau, inda wasu yankunan da a baya suka yi ƙaurin suna wajen hare-haren ’yan bindiga suka fara samun kwanciyar hankali sakamakon ƙara zafafa ayyukan soji.

Dauda Lawal ya yi kira ga al’ummar jihar da su ci gaba da nuna haƙuri tare da bai wa jami’an tsaro haɗin kai a yaƙin da ake yi da rashin tsaro.

Ya tabbatar musu da cewa gwamnati ba za ta yi kasa a gwiwa ba wajen lalata hanyoyin sadarwa da sansanonin masu aikata laifuka.

Gwamnan ya sake nanata cewa hanya mafi dacewa ta samar da zaman lafiya mai ɗorewa a Zamfara ita ce ɗaukar mataki mai tsauri kan ’yan bindiga, ba ta hanyar shiga tattaunawar sulhu da su ba.