Mabiya Harkar Musulunci ƙarƙashin jagorancin Shaikh Ibraheem Zakzaky (H) sun gudanar da jerin tarukan tunawa da cikar shekaru 30 da Waƙi’ar Abacha, wadda ta faru a ranar 12 ga watan Satumba na shekarar 1996, a garuruwan Zariya, Kaduna da Saminaka, kafin a kammala jerin tarukan da jawabin Jagoran Harkar Musulunci, Shaikh Ibraheem Zakzaky (H), a Abuja.
A ranar
Alhamis, 10 ga Satumba 2026, ’yan uwa Musulmi a Zariya sun gudanar da taron
tunawa da cikar shekaru 30 da Waƙi’ar, inda mahalarta taron suka haɗa da maza
da mata, ciki har da wasu daga cikin waɗanda suka shaida abubuwan da suka faru
a lokacin.
A yayin
taron, Malam Ahmad Fadlullah ya bayyana yadda jami’an tsaro suka zo gidan
Shaikh Zakzaky (H) da safe, inda suka sanar da cewa sun zo ne domin gudanar da
bincike. Ya ce bayan an nemi su gabatar da takardar izinin binciken, daga
bisani suka buƙaci jagora ya tafi da su.
Fadlullah
ya ce kafin tafiyar Jagoran, Shaikh Zakzaky (H) ya umurci ’yan uwa da su ci
gaba da ayyukan da suke gudanarwa.
Shi ma
Malam Musa Tudun Jukun, wanda ya samu rauni a lokacin Waƙi’ar, ya bayyana yadda
aka yi tunanin ya yi shahada, har aka sanya shi cikin shahidai, kafin daga
bisani aka gano cewa yana raye. Ya ce duka da aka yi masa sun yi sanadin
karyewar hannuwansa.
Bayan
jawabai, ’yan uwa sun yi muzahara ɗauke da hotunan shahidai, inda suka nufi
makabartar shahidai da ke unguwar Bishir a Zariya, suna rera waƙoƙin juyayi
tare da jinjina wa waɗanda suka rasa rayukansu.
A Kaduna
kuwa, mabiya Harkar Musulunci sun gudanar da taron tunawa da Waƙi’ar na tsawon
kwanaki biyu, tare da ziyartar wasu daga cikin makabartun shahidai, ciki har da
makabartar Cenima da ke Hayin Rigasa, da makabartar Bashama Road da ke Tudun
Wada, Kaduna.
An buɗe
taron da addu’a da karatun Alƙur’ani Mai Girma, kafin Na’ibin Wakilin ’Yan Uwa
na Da’irar Kaduna, Malam Aliyu Bakin Ruwa, ya gabatar da taƙaitaccen jawabi kan
manufar taron.
Daga
bisani, wasu daga cikin ’yan uwa da Waƙi’ar ta rutsa da su suka bayyana
abubuwan da suka faru da su a garuruwansu, ciki har da yadda jami’an tsaro suka
yi yunƙurin kashe wasu daga cikinsu, amma Allah Ya kubutar da su, har yanzu
suna raye.
A Saminaka
kuma, a ranar Juma’a, 11 ga Satumba 2026, ’yan uwa almajiran Shaikh Ibraheem
Zakzaky (H) sun gudanar da taron tunawa da shekaru 30 da Waƙi’ar a Husainiyatu
Shaheed Muhammad Mahmoud Turi.
An gayyaci
wasu daga cikin waɗanda suka shaida Waƙi’ar ko suka samu raunuka a cikinta
domin bayyana abubuwan da suka faru da su.
A
jawabinsa, Wakilin ’Yan Uwa na Da’irar Saminaka, Shaikh Umar Uba, ya yaba wa
mahalarta da masu bayar da gudunmawa wajen gudanar da taron. Ya jaddada
muhimmancin natsuwa da jajircewa yayin fuskantar jarabawa.
Shaikh
Umar Uba ya ce abubuwan da suka faru a lokacin Waƙi’ar sun ƙara tabbatar da
cewa ba yawan jama’a ne ke kawo nasara ba, sai dai ikhlasi da tsayawa kan
umarnin Jagora.
Ya ce: “Ba
yawa ne yake bada nasara, ikhlasi ne akan gaba. Tsayawa akan umarnin jagora shi
ne sirrin nasara.”
Ya kuma
bayyana cewa abin da ya faru a lokacin Waƙi’ar ya ƙara musu tabbacin cewa Harka
Islamiyya “kayan Allah” ce.
An rufe
taron da rabon kyaututtuka ga waɗanda suka amsa tambayoyi, kafin Malam Mustapha
Imam Lere ya jagoranci addu’ar rufe taron.
A ranar
Asabar, 12 ga Satumba 2026, an kammala jerin tarukan tunawa da Waƙi’ar da
jawabin Jagoran Harkar Musulunci, Shaikh Ibraheem Zakzaky (H), wanda ya gabatar
a gidansa da ke Abuja.
A yayin
bitarsa kan Waƙi’ar, Shaikh Zakzaky (H) ya bayyana cewa abin da ya faru a
wancan lokaci wani tsararren shiri ne da aka ƙulla da nufin kawo ƙarshen Harkar
Musulunci.
A cewarsa,
shirin ya fara ne da kamu, sannan a murƙushe masu gudanar da muzaharori, kafin
daga bisani a aiwatar da kisa idan an samu zaman shiru, da nufin kawo ƙarshen
Harka gabaɗaya.
Sai dai
Jagoran ya ce tsayuwar ’yan uwa, kiraye-kirayen jama’a daga ciki da wajen
Nijeriya, ci gaba da gudanar da muzaharori da tunkarar zaluncin mahukunta duk
da muzgunawa da cutarwa, sun taimaka wajen dakile wannan shiri.
Ya kuma
bayyana tunanin maƙiya na kawo ƙarshen Harkar Musulunci a matsayin “mafarki ne
da ba zai taɓa yiwuwa ba.”
Shaikh
Zakzaky (H) ya jaddada cewa Harka ita ce mafita ga al’umma, yana mai cewa
addini zai tabbata, in sha Allah.
Jagoran ya
kuma yi bitar tarihin Waƙi’ar, tun daga yadda ta fara, abubuwan da suka faru a
cikinta, har zuwa ƙarshenta da abin da ya biyo baya, tare da jaddada cewa
barazanar mahukunta ba za ta sa a bar gwagwarmayar tabbatar da addini ba.
Waƙi’ar
Abacha ta faru ne a ranar 12 ga Satumba 1996, a lokacin mulkin Janar Sani
Abacha, kuma wannan shekara ta 2026 ta cika shekaru 30 da aukuwarta.
Jerin tarukan
tunawa da Waƙi’ar ya gudana a wasu daga cikin muhimman wuraren da lamarin ya
shafa, ciki har da Zariya, Kaduna da Saminaka, kafin a kammala da jawabin
Jagoran Harkar Musulunci a Abuja.
An gudanar
da tarukan ne domin tunawa da waɗanda suka rasa rayukansu da kuma sake tuna
abubuwan da suka faru a lokacin Waƙi’ar, tare da jaddada darussan da mabiya
Harka suka ce sun koya daga gare ta.
© Dandalin
yaɗa labarai na Harkar Musulunci a ƙarƙashin Jagorancin Shaikh Ibraheem Zakzaky
(H).
13
Satumba, 2026
Post a Comment