Sakataren Rundunar Sojin Ƙasa ta Amurka, Dan Driscoll, ya yi murabus daga muƙaminsa a daidai lokacin da Ma’aikatar Yaƙin Amurka ke fuskantar sauye-sauyen shugabanci da korafe-korafen manyan jami’an soja.
Fadar White House ta tabbatar da murabus ɗin Driscoll a ranar Litinin, yayin da rahotanni suka ce tafiyar tasa ta biyo bayan rashin jituwa tsakaninsa da Sakataren Yaƙin Amurka, Pete Hegseth, kan yadda ake gudanar da sauye-sauyen rundunar da shirye-shiryen ƙarfafa ƙarfin soji.
Rahoton ya ce Driscoll ya ƙara nuna rashin jin daɗi kan yadda Hegseth ke dakile wasu tsare-tsaren sauya fasalin Rundunar Sojin Ƙasa da kuma shirye-shiryen inganta ƙarfin rundunar, musamman ta hanyar sauke manyan janar-janar da ke da alhakin aiwatar da waɗannan tsare-tsare.
Murabus ɗin ya zo ne yayin da Amurka ke ci gaba da shiga watan na bakwai na yaƙin da take yi da Iran, wanda ya jawo tura dubban sojojin Amurka zuwa Yammacin Asiya tare da rage yawan makaman da rundunar ke da su.
A halin yanzu, Rundunar Sojin Ƙasa ta Amurka na fuskantar gibi a shugabanci, bayan Hegseth ya sauke Babban Hafsan Rundunar Sojin Ƙasa, Janar Randy George, a watan Afrilu, ba tare da an naɗa wanda zai maye gurbinsa na dindindin ba.
Rahotanni sun ce Driscoll ya ɗauki matakin sauke George a matsayin abin da zai iya kawo cikas ga tsarin jagorancin rundunar a lokacin da ake cikin yaƙi.
An kuma ruwaito cewa Hegseth ya sauke shugaban rundunar sojin Amurka da ke Turai tare da dakile wasu ƙarin manyan jami’an soja daga samun karin girma.
Driscoll, wanda tsohon sojan Amurka ne kuma ya taɓa aiki a Iraki, an ce dangantakarsa da Mataimakin Shugaban Amurka, JD Vance, ta taimaka wajen kare shi daga sauye-sauyen da Hegseth ke yi na tsawon lokaci.
Sai dai wasu jami’ai sun ce Hegseth ya ɗauki Driscoll a matsayin barazana ta fuskar tsarin gudanar da ma’aikata, kuma ya daɗe yana neman a cire shi daga muƙaminsa.
Rahotanni sun kuma nuna cewa Dave Fitzgerald, Mataimakin Kwamishinan Ma’aikatar Sojin Ƙasa da ke kula da kirkire-kirkire, na iya yin murabus shi ma.
Wasu masu sharhi kan harkokin soja da masu sukar gwamnatin Amurka sun ce sauye-sauyen shugabanci da ake yi a Ma’aikatar Yaƙi na iya raunana tsarin rundunar daga cikin gida.
Sanata Jack Reed, babban ɗan Democrat a Kwamitin Majalisar Dattawan Amurka kan Harkokin Soji, ya zargi Hegseth da haddasa “mummunar illa mai ɗorewa” ga Ma’aikatar Yaƙi, yana mai cewa yawan sauye-sauyen shugabanci na cutar da haɗin kan rundunar.
Post a Comment