Malam
Sidi Manir ya bayyana cewa sadaukarwar Imam Husaini (A.S.) a filin Karbala ita
ce madubi kuma abin koyi ga duk masu neman 'yanci da adalci a faɗin duniya,
yana mai cewa irin juriyarsa wajen fuskantar zalunci har yanzu tana ƙarfafa
masu gwagwarmayar neman gaskiya.
Ya
bayyana hakan ne yayin da yake amsa tambayoyin 'yan jarida a garin Funtua,
Jihar Katsina, a yayin tattakin Arba'in da ake gudanarwa domin tunawa da cika
kwanaki arba'in da shahadar Imam Husaini (A.S.) a ranar Lahadi 2 ga Agustan
2026.
A
cewarsa, manufar tattakin ita ce nuna alhini da goyon baya ga iyalan Manzon
Allah (SAWW) bisa irin wahalhalu da azabtarwar da suka fuskanta bayan kisan
gillar da aka yi wa Imam Husaini (A.S.), iyalan gidan Annabi (SAW) da
sahabbansa a filin Karbala. Ya ce bayan wannan mummunan lamari, an ci gaba da
gallaza wa matan gidan Annabi (SAW) da ƙananan yaran da suka tsira, inda aka
ɗaure su da sarƙoƙi, ana dukansu tare da jan su a cikin hamada cikin
matsananciyar ƙishirwa, yunwa da zafin rana, tun daga Iraki har zuwa birnin
Dimashƙu da ke ƙasar Siriya.
Malam
Sidi Manir ya jaddada cewa tunawa da Arba'in ba al'amarin wata mazhaba ba ne,
illa al'amari ne da ya shafi Musulunci baki ɗaya. Ya ce malamai na Shi'a da
Ahlus Sunna sun ruwaito hadisin da Manzon Allah (SAW) ya ce:
"Husaini
daga gare ni yake, ni ma daga Husaini nake."
Ya
bayyana cewa wannan hadisi yana nuna irin matsayi da darajar Imam Husaini
(A.S.) a wajen Manzon Allah (SAW), yana mai cewa duk wanda ya cutar da Imam
Husaini (A.S.), ya cutar da Manzon Allah (SAW), kuma duk wanda ya tausaya masa,
ya tausaya wa Manzon Rahama (SAW).
Ya
ƙara da cewa wannan ne ya sa Musulmai daga mazhabobin Shi'a da Ahlus Sunna ke
gudanar da tarukan tunawa da Arba'in domin tuna irin zaluncin da aka yi wa
iyalan Manzon Allah (SAW) da kuma ɗaukar darussa daga abin da ya faru.
Dangane
da darussan Karbala, Malam Sidi Manir ya ce tsayin daka da juriyar Imam Husaini
(A.S.) wajen fuskantar azzalumai su ne suka zama tushen gwagwarmayar dawo da
martabar Musulunci a wannan zamani. Ya ce wannan ne ya sa azzaluman duniya ke
ɗaukar irin wannan tafarki a matsayin barazana ga mulkinsu.
Ya
ba da misalin Juyin Juya Halin Musulunci na Iran, gwagwarmayar al'ummar
Falasdinu, da kuma gwagwarmayar Harkar Musulunci a Nijeriya ƙarƙashin
jagorancin Shaikh Ibraheem Zakzaky (H), yana mai cewa duk sun samo ƙarfin gwiwa
ne daga darussan Karbala.
Ya
kuma ce idan aka yi nazari kan yadda Imam Husaini (A.S.) da sahabbansa 72 suka
tsaya tsayin daka wajen fuskantar dubban sojojin Yazidu, za a fahimci cewa
gaskiya na iya yin nasara duk da ƙarancin mabiya, yana mai nuni da cewa
sadaukarwarsu ta tabbatar da abin da ake kira "nasarar jini a kan
takobi."
A
ƙarshe, Malam Sidi Manir ya yi kira ga mahukuntan Nijeriya da su ji tsoron
Allah wajen kare rayuka da dukiyoyin al'umma, su guji zubar da jinin bayin
Allah ba tare da wani haƙƙi ba.
Haka
kuma ya yi kira ga al'ummar ƙasar da su rungumi koyarwar Musulunci a matsayin
mafita ga matsalolin da ake fuskanta, yana mai cewa siyasar da aka daɗe ana
aiwatarwa ba ta samar da mafita mai ɗorewa ba.
Ya
kammala da cewa bin tafarkin Imam Husaini (A.S.) da kuma amsa kiran Shaikh
Ibraheem Zakzaky (H) na tsayawa kan gaskiya da adalci shi ne hanyar fita daga
zalunci da matsalolin da ƙasar nan ke ciki.
Post a Comment