Babban kwamandan rundunar **Khatam al-Anbiya** ta Jamhuriyar Musulunci ta Iran, Manjo Janar Ali Abdollahi, ya gargadi ƙasashen yankin da su guji mara wa Amurka baya, yana mai cewa duk ƙasar da ta mayar da kanta "garkuwar kariya" ga Amurka za ta "ƙone a cikin wutar yaƙi."
A cikin wata sanarwa da ya fitar a
ranar Asabar, Abdollahi ya zargi Amurka da ƙara rura wutar rikici a yankin,
yana mai cewa hakan wani ɓangare ne na dabararta na faɗaɗa tasiri da mamaya a
yankin.
Ya ce ya zama wajibi ƙasashen
Musulmi su yi taka-tsantsan, su lura da abin da ya kira laifukan Amurka, tare
da sake nazarin alaƙarsu da haɗin gwiwarsu da ita.
"Duk ƙasar da ta mayar da kanta
garkuwar kariya ga Amurka mai aikata ta'addanci da cin zarafi, za ta ƙone a
cikin wutar yaƙi," in ji shi.
Abdollahi ya kuma yi zargin cewa
Amurka ta yi amfani da sansanoninta da ke wasu ƙasashen yankin a lokacin abin
da ya bayyana a matsayin yaƙin kwanaki 40 da aka ƙaddamar kan Iran tun daga
ranar 28 ga Fabrairu.
A cewarsa, Iran ta mayar da martani
ta hanyar kai hare-hare kan sansanonin sojin Amurka da muradunta a waɗannan
ƙasashe, baya ga wuraren Isra'ila.
Kwamandan ya ce rikicin ya nuna cewa
Amurka ba ta da wata iyaka wajen aiwatar da manufofinta, ko da hakan zai cutar
da muradun ƙasashen Musulmi.
Ya kuma yi zargin cewa Washington na
amfani da dukiyoyi, ababen more rayuwa da muhimman albarkatun ƙasashen Musulmi
a matsayin kariya ga rundunarta, tare da ƙarfafa ƙarfin soja da na tsaro na
Isra'ila.
Abdollahi ya ƙara da cewa Iran,
rundunonin makamanta da kuma abin da ya kira **Axis of Resistance**, sun nuna
cewa daidaiton ƙarfin iko a yankin ya sauya, yana mai ikirarin cewa Amurka da
Isra'ila ba su cimma manufofinsu kan Jamhuriyar Musulunci ta Iran ba.
Kalaman na zuwa ne a daidai lokacin
da ake ci gaba da samun tsamin dangantaka tsakanin Iran, Amurka da Isra'ila,
yayin da Tehran ke ci gaba da gargadin ƙasashen yankin kan bai wa Amurka damar
amfani da ƙasashensu wajen gudanar da ayyukan soja.
Post a Comment